Paano kung mula noon hanggang ngayon naka base lang tayo sa siyensya

Nag lalaro sa isip ko ang tanong na

Paano kung mula noon hanggang ngayon

Naka base lang tayo sa siyensya?

Na hindi pumasok sa isip natin ang salitang

Diyos at wala ang relihiyon sa ating bokabularyo?

 

Siguro kung ganoon man

wala sa atin ang maniniwala sa multo

O sa mga engkanto

O sa mga anghel at demonyo

Sa aswang at mga nuno sa punso

Sa milagro na madalas nating ipinag papasalamat na nangyari

Sa tuwing may magandang naganap na di natin maipaliwanag

 

Siguro wala din ang salitang atheist at anti-Christ

Kaya malamang wala rin si Satan na gumawa raw ng “metal”

Wala rin sigurong namatay sa ngalan ng relihiyon

Na maraming beses na rin nangyari

At masyadong mahaba kung isasama ko dito

Pero kung susumahin mo

Sa likod ng mga giyera bitbit ang salitang relihiyon

Ay nakaupo ang nag iisang taong may isang ambisyon

Ang makuha ang mundo

At kilalanin ang kinikilala niyang Diyos

 

Eto pa

Ano nalang kaya yung pupuntahan at makikita ng tao sa mga bakasyon nila kung walang relihiyon?

Kasi ibig sabihin non, wala na rin ang mga nag lalakihan at nag gagandahang religious sites

Kagaya ng mga dambuhalang monumento sa Egypt

Sa ibabaw ng bundok sa rio

Mga ginugubat na templo sa Cambodia

Ang batu cave sa Malaysia

Basilica of san vitale sa Italy

Spanish Synagogue ng Czech Republic

Wala narin ang mga kapistahan ng ibat ibang santo

At kung mawawala yong mga yon

Ano nalang yung mga monumento natin?

Mga sumikat na artista?

Bayani?

Sila Einstein, newton at edison?

Aalayan ba natin sila ng bulaklak?

Saka Ibig sabihin may pasok tayo ng pasko at holy week?

At yung simula at tapos ng Ramadan?

Grabe naman

 

Siguro bawal na din tayo humiling

O walang kwentang humiling

O hindi na tayo hihiling sa kung ano man na sana sagutin ka ni ano

O sana humaba pa yung buhay ni ano

O sana kung nasaan man si ano masaya na siya

Kasi lahat hahanapan natin ng siyentipikong dahilan

Kaya pag sinabing hindi ka na mag kaka-anak eh hindi ka na talaga mag kaka-anak

O kung tinaningan ka na mamamatay ka na talaga

 

Maapektuhan din kaya yung creativity ng isang pintor non?

Kasi di na tayo mag iimagine ng ibat ibang itsura ng halimaw kasi wala namang ganoon

Puro alien kaya ipipinta natin non? O puro tao lang talaga

hamalaman at prutas? Galaxy kaya o mga kapitbahay nating planeta?

Parang ang konti diba?

Tapos di rin maipipinta yung the last supper ni Leonardo da Vinci

O yung The creation of adam ni Michelangelo

 

E pano naman kaya sa musika

Nako tiyak wala yung mga sumikat na kanta nila John Lennon na IMAGINE

May slayer pa kaya na banda?

Yung JUDAS ni Lady Gaga

LEPPER MESIAH ng Metalica

AMAZING GRACE ni John newton

HOW GREAT THOU ART ni Carl Gustav Boberg

Ibig sabihin sila at ang maraming pang ibang may paksa o bahid ng relihiyon o paniniwala sa diyos eh wala na

Parang ang hirap yata?

Parang ang konti nalang ng matitira

 

Tapos isipin mo

Wala din yung mga libro ng ibat ibang relihiyon na napakayaman sa ibat ibang pangyayari

At kaalaman para mas maunawaan o maintindihan mo yung mundo kung maniniwala ka

 

Hay

Isang mahabang hay

Kasabay ng pag iisip sa palaisipan

Na paano nalang ang mundo kung puro siyensya tayo

 

Pero isipin mo

Ngayon sa ospital

Sa lugar kung saan siyensya dapat ang namumuno

Makikita mo ang munting liwanag ng kandila at mga taong nakaupo

Umaasa na kung di man mapagaling ng gamot

Sana mapagaling ng paniniwala at mga katagang

“Panginoon Ikaw na po sana ang bahala sa kanya.”

Advertisements